The Twefth Entry

Sabado night. Sagrado ito para sa mga normal na teen-agers, pinakamasayang oras ito ng weekend nila, siyempre, pagkatapos ng limang araw na pakikipagbuno sa klase, pagkopya ng assignments, pagsisinungaling sa teacher at pag aaral, sabado ng gabi lang talaga sila makakapag "unwind" at makakapag "day-off" dahil sabado ng umaga, gagawa sila ng assignment, Sabado ng hapon, maglalaba. Natural na takbo na lang yan ng buhay, kanya kanyang diskarte kung papano maglilibang sa sabado ng gabi, ang iba'y nakikipagkita sa barkada, ang iba ay nag shoshopping kasama ang pamilya, ang iba ay nakikipagdate sa siyota, at meron ding iba na nanonood na lang ng Bitoy's Funniest Videos. "gimik" ito kung tawagin.

Hindi alam ng marami na hindi ako mahilig gumimik, dahil madalas, kung nayayaya ako, umaarte lang ako na nag enjoy ako, pero ang totoo, hindi. Ewan ko ba, Highschool pa lang, may problema na ako sa "socialization" o pakikipaghalubilo sa tao, pakiramdam ko, lagi akong nagmumukhang tanga sa harap ng mga ibang tao. Hindi ako kumportable, marami akong gustong ibida at ikwento pero nonsense para sa kanila mga sinasabi ko, madali akong maapektuhan ng reaksyon ng isang grupo ng tao na nagkakaintindihan, lalo kapag nasa party, kung saan nagyayabangan lang ang lahat, nagpapagandahan ng gestures at ng postures, nag papacute lang ang lahat, Pakiramdam ko, isa akong scientist na napunta sa loob ng parlor ni Ricky Reyes. Kahit na kakilala ko sila, hindi ko maiwasang maramdaman na Out of Place ako. O baka naman ayaw ko lang talagang isama ang sarili ko. Ewan.

Ano ba talaga ang sense ng Party? hindi yung party na celebration ha, yung party ng mga teen agers, yung may sayawan, yung may pakikipag flirt, yung may nagpapapogian. minsan na akong nakwentuhan tungkol sa ganyang klaseng party, ng mga party peolpe, tuwang tuwa talaga sila, siguro, umulan ng ginto nung gabing yun, sabi ko sa sarili ko, pero mali ako, eto daw ang nangyari ayon sa kwento nila:

- Pumasok sila sa dico.
- Nagbayad ng Entrance.
- Nakakita sila ng maraming tao.
- Naramdaman nila na malamig.
- Nagmukhang tanga sa loob ng limang minuto.
- Pagkalipas ng limang minuto, sumayaw sila.
- Nakaramdam ng uhaw.
- Uminom sila ng inumin.
- Nakakita ng babae.
- Umihi pagkatapos uminom.
- Sumayaw ulit.
- Nakakita ng lalake.
- Nakaramdam ng pagod.
- Umupo sa upuan.
- Naglakad papunta sa "exit"
- Lumabas ng disco.
- Umuwi.

Habang kinukwento nila yan, tawa sila ng tawa at bakas sa mukha nila ang galak at tuwa at parang gusto pa nila akong tumambling sa tuwa pagkatapos kong marinig ang kwento nila. Ako naman ay bakas sa mukha ko ang pagtataka kung saan sila natutuwa. Hindi ko talaga maintindihan. Anong meron dun? anong nakakatuwa dun? eh araw araw naman silang nakakakita ng babae at lalake, araw araw din silang umiinom at nababalisawsaw, Mukha naman talaga silang tanga kahit hindi sabado night,buti sana kung naging aso yung lalake, o kaya nahubaran yung babae, baka matawa pa ako. may tumumba ba sa mga sumasayaw? meron bang kamuntik mamatay dahil sa pagkasamid? Meron bang dumilaw ang mukha kakapigil ng ihi? meron bang madre na tumatagay? Anong meron? bakit sila tuwang tuwa?

Sayang ang sabado night nila. mas mageenjoy pa ako sa children's party kesa sa ganun. E ano kung pangbata? mas gusto ko nga sila eh, E ano kung corni, mas corni kayo!, E ano kung spaghetti lang ang pagkain? atlis hindi boy bawang, mas masustansiya! E ano kung may lobo at party hat? ayos nga yun eh, pwede kong gulatin yung lola ko pag uwi, puputukin ko yung lobo, at pwede kong gawing bookmark yung party hat.